aarzoo

mujhay muajzoN pe yaqeeN nahi mager aarzoo hai k jab qaza
mujhay bazm-e-dehr se le chalay
to phir aik baar ye izn de
k lehed se uth k aa sakooN
teray der pe aa k sada karooN
tujhay gham-gusaar ki ho talab to teray huzoor mein aa rahoon
ye na ho to soo-e-rah-e-adum, main phir aik baar rawana hoon
                                                           - Faiz Ahmad Faiz -
                                                         (ser-e-waadi-e-seena,
                                                         Nuskha haay-e-wafa)

                        allah-us-samad

wo kehti hai tum achhay palmisT nahi ho
tum ne jitnay daaway kiye thay, sab jhooTay thay
tum ne kaha tha
ham dono k saad sitaaray, chaand k gher mein gher ker lein gay
ham tum dono hijr himala ser ker lein gay
lekin qurb-e-dawaam na aaya
dukh aaye, araam na aaya
us ne tanzan ye bhi kaha hai
tum ne jis ustaad se zaayecha-sazi seekhi
shayed al-beruni bhi shagird tha uska
us jazbati lerki ko ye kon bataaye
aisee bhi ek zaat hai jo in raykhaaoN ko
jab chaahay aur jaisay chaahay ker deti hai
ek daaman angaaroN se
aur
ek khsuhyoN se bher deti hai
                                    - Perveen Shakir -

                        mushkil hogi

tum ager mujh ko na chaho to koi baat nahi
tum kisi aur ko chaho gi to mushkil hogi

ab ager mail nahi hai to judayi bhi nahi
baat tori bhi nahi tum ne banayi bhi nahi
ye sahara bhi buhat hai meray jeenay k liye
tum ager meri nahi ho to parayi bhi nahi
meray dil ko na saraho to koi baat nahi
ghair k dil ko saraho gi to mushkil hogi

tum haseeN ho, tumhein sab pyar hi kertay hongay
main jo merta huun to kya aur bhi mertay hongay ?
sab ki aankhon mein esi shoq ka toofaaN hoga ?
sab k seenay mein yahi derd ubhertay hongay ?
meray ghum mein na karaho to koi baat nahi
aur k ghum mein karaho gi to mushkil hogi

phool ki tarah haNso, sab ki nigahoN mein raho
apni maasoom jawani ki panahoN mein raho
mujh ko wo din na dikhana tumhein apni hi qasam
main tarasta rahoon, tum ghair ki baaNhoN mein raho
tum jo mujh se na nibaho to koi baat nahi
kisi dushman se nibaho gi to mushkil hogi

tum ager mujh ko na chaho to koi baat nahi
tum kisi aur ko chaho gi to mushkil hogi ..
                                                - Sahir Ludhianvi -

                        zaybindah beTi  k liye aik nazm

bees baras ki baat hai lekin yuuN lagta hai
jaisay kal ki baat ho, jab wo
nannhay nannhay haath beRha ker mujh ko chhooti, mairee jaanib
aati thi to
us k laboN per aik sitara khilta tha,
mairee rooh ki saari khushbu aur sach-chaai
us k lams mein jaag uThti thi
allah ... ! kaisay achhay din thay !!

            ab main uski pyaari pyaari
             phooloN jaisee zaybindah ko chhoota hoon to
            yuuN lagta hai
            jaisay sab kuchh loT aaya ho
            jaisay us ne mairee khaatir
            apna bachpan duhraya ho !

mola ... jaisay tu ne mairee arzi suni aur
apnay jaari faiz se mairay man ko shaant rakha
mujh per aur ek rehmat ferma
zaybindah ko uski maaN ki khushbu de ker
Aqib aur Rosheen ki dunya
            pehlay se bhi roshan ker de
is taaza masoom haNsi se
            un k saaray gher ko bher de !!
                                                - Amjad Islam Amjad -

         misaal-e-chehra-e-paighumbaraaN gulaab k phool

ravish ravish pe hein nik_hat-fishaaN gulaab k phool
haseeN gulaab k phool, arghawaaN gulaab k phool

ufuq ufuq pe zamaanoN ki dhund se ubhray
tuyoor, naghmay, nadi, titliyaaN, gulaab k phool

kis enhimaak se baiThee kasheed kerti hai
uroos-e-gul ba-qabaa-e-jahaaN gulaab k phool

jahaan-e-girya-e-shabnam se kis ghuroor k saath
guzer rahay hein tabassum-kunaaN gulaab k phool

ye maira daaman-e-sad-chaak, ye rida-e-bahaar
yahaaN sharaab k chheeNTay wahaaN gulaab k phool

kisi ka phool sa chehra aur us pe rung-e-afroz
gundhay hoay beh kham-e-gaysuaaN gulaab k phool

khayaal-e-yaar teray silsilay, nashoN ki rutein
jamaal-e-yaar teri jhalkiyaaN gulaab k phool

meri nigaah mein daur-e-zamaaN ki her kerwaT
lahoo ki lehr, diloN ka dhuwaaN gulaab k phool

ye kia tilism hai, ye kis ki yaasmeeN baaNhein
chhiRak gayi hein jahaaN der jahaaN gulaab k phool

sulagtay jaatay hein chup chaap haNstay jaatay hein
misaal-e-chehra-e-paighumbaraaN gulaab k phool

kaTi hai umr bahaaroN k sog mein Amjad
meri lehed pe khilein jaavedaaN gulaab k phool
                                                            - Majeed Amjad -

                               khooN-baha

apnay sheh-sawaroN ko
qatl kernay waaloN se
khooN-baha talab kerna
waarisoN pe waajib tha
qaatiloN pe waajib tha
khooN-baha ada kerna
waajibaat ki takmeel
munsifoN pe waajib thi
(munsifoN ki nigraani
qudsiyoN pe waajib thi)
waqt ki adaalat mein
aik samt masnad thi
aik samt khanjer tha
taaj-e-zer-nigaar ek samt, ek taraf thi majboori
ek taraf muqadder tha
taayefay pukaar uTThay
"taaj-o-takht zinda-baad !
saaz-o-rakht zinda-baad !"

khalq ham se kehti hai, sara maajra likkhein
kis ne kis tarah paya apna khooN-baha likkhein
chashm-e-nam se sherminda,
ham qalam se sherminda, sochtay hein kia likkhein
                                                       - Iftekhar Arif -

tum ne bhi konsa chaha tha mujhay !

tum ne bhi konsa chaha tha mujhay
meri baatein bhi ghalat, meray eraaday bhi ghalat !
bay-wafaayi ka ye khud-saakhta bohtaan bhi tasleem mujhay
ye bhi mana k gham-e-deher jawaaN tha to gham-e-jaaN
                                                               ko meri aankh k aaNsoo na milay
jab zamanoN ki ye bay-meher havaein meri sochoN ko jala deti hein
                                                                       main sochta hoon
jab gham-e-deher ki palkein teri jaanib meri shiddat ko ghata deti hein
                                                                       main sochta hoon
jab kabhi apni jafaaein mujhay khud apni nigaahon mein gira deti hein
                                                                       main sochta hoon
                                                            tum ne bhi konsa chaha tha mujhay
                                                                                                            - Khalid Shareef -

                        baarhwaaN khilari

khush-gawar mosam mein
un-ginat tamashaayie
apni apni TeemoN ko
daad denay aatay hein
apnay apnay pyaroN ka
hosla beRhaatay hein
main alag thalag sab se
baarhwein khilaRi ko
hooT kerta rehta hoon
baarhwaaN khilaRi bhi
kia ajab khilaRi hai
khayl hota rehta hai
shor machta rehta hai
daad peRti rehti hai
aur wo alag sab se
intezaar kerta hai
aik aisee saa-at ka
aik aisay lamhay ka
jis mein saaneha ho jaaye
phir wo khaylnay niklay
taalyon k jhurmaT mein
aik jumla-e-khush-kun
aik naara-e-tehseen
us k naam per ho jaaye
sab khilaRyoN k saath
wo bhi muatber ho jaaye
per ye kam hi hota hai
phir bhi log kehtay hein
khayl se khilaRi ka
umr bher ka rishta hai
umr bher ka ye rishta
chhooT bhi to sakta hai
aakhri wisil k saath
Doob jaanay wala dil
TooT bhi to sakta hai
tum bhi Iftekhar Arif
baarhwein khilaRi ho
intezaar kertay ho
aik aisay lamhay ka
aik aisee saa-at ka
jis mein haadsa ho jaaye
jis mein saaneha ho jaaye
tum bhi Iftekhar Arif
tum bhi Doob jaao gay
tum bhi TooT jaao gay
                        - Iftekhar Arif -

                        ham log

daairoN mein chaltay hein !
             daairoN mein chalnay se
daairay to beRhtay hein
            faaslay nahi ghaTtay

aarzooein chalti hein !
            jis taraf ko jaatay hein
manzileiN tamanna ki
            saath saath chalti hein !

gerd uRti rehti hai
derd beRhta jata hai
            raastay nahi ghaTtay !

subh-dam sitaroN ki tez jhilmilahaT ko
roshni ki aamad ka pesh-baab kehtay hein !
ek kiran jo milti hai, aaftab kehtay hein !
daaira badalnay ko, enqilaab kehtay hein !
                                                - Amjad Islam Amjad -

                                    aetraaf

ab meray paas tum aayee ho to kia aayee ho

main ne maana k tum ek paiker-e-ranaayee ho
chaman-e-dehr mein rooh-e-chaman-aaraayee ho
talat-e-mehr ho, firdaus ki bernaayee ho
bint-e-mahtaab ho, gerdooN se uter aayee ho

mujh se milnay mein ab andesha-e-ruswaayee hai
main ne khud apnay kiye ki ye saza paayee hai

khaak mein aah milaayee hai jawaani main ne
shola-zaaroN mein jalaayee hai jawaani main ne
shehr-e-khoobaaN mein gaNwaayee hai jawaani main ne
khwaab-gaahoN mein gaNwaayee hai jawaani main ne

husn ne jab bhi enaayat ki nazer daali hai
meray paimaan-e-muhabbat ne siper daali hai

un dinoN mujh pe qayaamat ka junooN taari tha
ser pe sershaari-o-ishrat ka junooN taari tha
maah-paaroN se muhabbat ka junooN taari tha
sheheryaaroN se raqaabat ka junooN taari tha

bister-e-makhmal-o-sanjaab thi dunya mayree
aik rangeen-o-haseeN khwaab thi dunya mayree

kia suno gi mayri majrooh jawaani ki pukaar
meri feryaad-e-jiger-doz mayra naala-e-zaar
shiddat-e-kerb mein doobi hui mayri guftaar
main k khud apnay mazaaq-e-tarab-aageeN ka shikaar

wo gudaaz-e-dil-e-merhoom kahaaN se laaooN
ab main wo jazba-e-maasoom kahaaN se laaooN

ab meray paas tum aayee ho to kia aayee ho
                        - Majaaz Lakhnavi  (Asrar-ul-haq Majaaz) -